Џунтоли за трансферот кој не успеал да го реализира ова лето: Цела Италија жали за него

Кристијано Џунтоли со години беше трансфер мозок на Наполи и беше задолжен за спортскиот проект на Аурелио Де Лаурентис, но сега работи во Јувентус и ова лето имаше навистина многу тешка задача.

Јувентус направи поголем рез во првиот тим и Џунтоли се обиде да исполни најголем дел од желбите кои ги посака новиот тренер Тиаго Мота, меѓутоа самиот открива дека не успеал да реализира една.

Рикардо Калафиори се поврзуваше со трансфер во сите големи италијански клубови, вклучувајќи го и Јувентус, но на крајот до израз дојде пазарната моќ на премиерлигашите.

Арсенал го одврза ќесето и експресно го донесе талентираниот дефанзивец, по што Јувентус целосно се откажа од трката и во ниту еден момент не реши да наддава.

– Секако дека постои жал за Калафиори, за него жали цела Италија, не само Јувентус. Мора да се помириме со фактот дека немаме доволна финансиска моќ да задржиме играч со такво ниво во Италија. Сите големи тимови во Италија донесоа нов дефанзивец, но никој не можеше да си го дозволи Калафиори, – вели Џунтоли за играчот кој за сума од 45 милиони евра се пресели во Северен Лондон.