Џорџ избегна потешка повреда, може да се врати во плејофот

Лос Анџелес Клиперс доживеа двоен удар на пресметката со Оклахома Сити Тандер на која претрпе пораз од 101-100, но и остана без услугите на ѕвездата Пол Џорџ.

Џорџ се повреди во последната четвртина и мораше да биде изнесен од теренот и стравувањата беа дека можеби се работи за проблем кој може долго време да го оддалечи од терените. Меѓутоа Пол ќе биде недостапен во наредните две до три недели што значи дека ќе ги пропушти сите преостанати натпревари од регуларниот дел од сезоната (девет).

Потоа повторно ќе биде прегледан и ќе се има почиста слика за проблемот со десното колено, односно во таборот на Клиперс се надеваат дека тој би можел да помогне во некоја фаза во плејофот.

Сепак тимот од Калифорнија прво ќе мора да се избори за место во разигрувањето затоа што битката е жестока на Западот, многу тимови се доста блиску и ќе биде занимливо во завршницата на основниот дел, а потоа и во плеј-ин форматот по што ќе бидат познати сите парови во плејофот.