Џордан го врати тренерот кој му донесе плејоф настапи на Шарлот

Екипата на Шарлот Хорнетс назначи нов тренер и тоа е искусниот Стив Клифорд за кого ова ќе биде втор мандат на клупата на овој клуб.

Клифорд е тренерот кој е втор на вечната листа по победа остварени за Шарлот, но тоа во 2018 година не беше доволно и заработи отказ и покрај тоа што успеа да му донесе два плејоф настапи на тимот во петте години.

Сега Стив ќе добие нова шанса од првиот човек Мајкл Џордан и генералниот менаџер Мич Купчак кои одлучија токму тој да биде изборот откако Кени Еткинсон од Голден Стејт Вориорс се премисли во последен момент и одлучи да остане во Сан Франциско како асистент на Стив Кер.

Инаку Клифорд долго години е во НБА, беше асистент во повеќе тимови, а како главен освен во Шарлот/Бобкетс беше и во Орландо Меџик. Неговиот учинок е 292-345 (победи-порази) во осумте сезони во најквалитетната лига на светот.