Џенова донесе разочарување за навивачите на Милан при прославата на големиот јубилеј

Милан како клуб со сите почести ги пречека своите легенди кои беа дел од 125-годишната историја на клубот, јубилеј кој направи денешниот натпревар против Џенова да биде посебен на секој фан на италијанскиот великан.

Скромното издание против Црвена Звезда на средина на неделата донесе доста критики од тренерот Пауло Фонсека, но „росонерите“ денеска беа уште полоши на денот кога прославуваа голем јубилеј и игрчаите режираа разочарување за своите верни навивачи.

Џенова пристигна со цел да се брани на „Сан Сиро“ и љубоморно го бранеше својот гол, па иако имаше и малку среќа, на крајот успеа во својата намера.

Алваро Мората во 79-та минута беше најблиску до водечки и победоносен гол за Милан, но неговиот удар заврши во рамката на голот.

Севкупно гледано, Милан понуди премалку на меч кој сите го најавуваа со посебна страст, а на кој и играчите играа во специјални ретро дресови за да се одбележи 125-годишнината од постоењето.