Џака распали по соиграчите откако Арсенал си ги упропасти шансите за пласман во ЛШ: Седете си дома!

Арсенал одигра ужасно лош натпревар во Премиер лигата во најлошо можно време, или во моментите кога се одлучува кој тим ќе заврши на четвртата позиција на табелата, која е последна што гарантира фудбал во Лигата на шампионите наредната сезона.

Иако Арсенал пред две кола имаше комотни плус четири пред Тотенхем и се чинеше дека е блиску до обезбедување на четвртото место, поразот од градскиот ривал и последниот од Њукасл изминатава вечер, направија сега се да биде во рацете на „петлите“.

„Топчиите“ беа непрепознатливи на „Ст. Џејмс парк“ и заслужено загубија од Њукасл со 2:0, па сега ќе им биде потребно чудо во последното коло за да се најдат во Лигата на шампионите. Тотенхем влегува во завршната рунда со два бода предност и доволен ќе му биде бод против испаднатиот Норвич, бидејќи Арсенал има далеку полоша гол разлика од ривалот со Северен Лондон.

По ваквите непосакувани околности за Арсенал, со жестока изјава се јави Гранит Џака, кој реши да распали по своите соиграчи.

– Сакавме да се покажеме на голем меч, но тоа не се случи. Тешко е да се најдат зборови, но ова се случува кога не го слушате тренерот и правите работи како што самите мислите. Тоа не функционира така. Луѓето секогаш зборуваат за лидери во овој тим, но ние не играме тенис, играме фудбал.

– Ако некој не е подготвен за овој притисок, подобро нека остане дома. Не може да дојдеме на вака важен меч и да одиграме вака. Игравме многу лошо, изгледавме лошо. Планот за игра од тренерот беше сосема друг, а ние одигравме спротивно од тоа. Тие не наттрчаа од првата до последната минута. Кога играте вака, не заслужувате да бидете во Лигата на шампионите, – изјави Џака.