Џака пред враќањето на „Емирејтс“: Останав во контакт со тројца играчи на Арсенал

Гранит Џака даде неколку зајадливи изјави за Арсенал по освоената титула во Бундеслигата, па ако се знае дека имаше и навистина проблематичен период како капитен на „топчиите“, навистина нејасно е каков пречек ќе добие денеска на „Емирејтс“.

Арсенал и Баер Леверкузен ќе одиграат пријателски меч во последните подготовки за новата натпрерварувачка сезона, а Гранит за ривали ќе ги има фудбалерите кои му беа соиграчи до пред една година.

Швајцарскиот играч за врска ќе има специјално враќање на местото каде мина седум години од кариерата, но самиот открива дека во контакт останал само со тројца играчи од првиот тим.

– Кога играте за еден клуб седум години, нормално е да има специјално чувство кога ќе се вратите на истото место. Има познати лица од мојот период во Арсенал.

– Во клубот работат прекрасни луѓе, а јас останав во рердовен контакт со тројца играчи. Тоа се Томас Парти, Зинченко и Габриел Жезус. Едвај чекам да играм против нив, ова е ривал кој ќе ни дојде како добра подготовка за Лигата на шампиони, – вели Џака.