Двајца ракометари на Загреб се степале по поразот од Нант во ЛШ

Ракометниот клуб Загреб денеска информираше дека суспендирал двајца свои играчи, а причина е нивната меѓусебна физичка пресметка по вчерашниот натпревар во Лигата на шампионите.

Се работи за Милош Кос и Звонимир Срна, а во соопштението на клубот се наведува дека иницијатор на тепачката бил Кос и тоа по поразот од Нант на домашен терен.

– Привремената суспензија останува во сила до завршување на постапката што ќе ја води Дисциплинската комисија на Ракометниот клуб Загреб.

– Клубот нема да толерира никакво непрофесионално однесување и целосно ќе соработува со Дисциплинската комисија, а и  навремено ќе ја информира јавноста со повеќе информации кога ќе се утврдат сите факти, стои во соопштението на хрватскиот клуб.

Срна е хрватски репрезентативец, додека Кос настапува за репрезентацијата на Србија.