Два корнери го решија победникот на торинското дерби (Видео)

Јувентус традиционално влегува како фаворит во „Дерби дела моле“ кога игра на домашен терен, но тимот на Макс Алегри денеска мораше да се намачи за да стигне до трите бода со оглед на важните отсуства во тимот.

Макс Алегри не можеше да смета на Влаховиќ и Киеза на денешниот меч, но доби позитивен одговор од останатите играчи на теренот, а особено од оние кои доминираат во скок играта.

Јувентус одново не одигра спектакуларен фудбал, но успеа да освои драгоцени три бода во битката со лутиот градски ривал, кој потклекна на почетокот на второто полувреме во две слични ситуации.

Најпрво умешен во шеснаесетникот беше Гати кој успеа да погоди по еден голем карамбол, а по сличен рецепт, во листата на стрелците се запиша и Аркадиуш Милик.

Два корнери го решија победникот на големото торинско дерби, а новите три бода значат дека Јувентус се искачи на третото место на табелата.