Два англиски великани се распрашуваат за француски напаѓач, позната е цената по која можат да го добијат

Англиските фудбалски великани, Манчестер Јунајтед и Ливерпул се во потрага по засилувања за наредната сезона, а по се изгледа нивните патишта се вкрстија и се интересираат за ист играч, фудбалер кој го носеше дресот на Франција на Светското првенство во Катар.

Се работи за Рандал Коло Муани, човекот кој можеше да и донесе мундијалска круна на својата земја, но Мартинез со брилијатна одбрана спречи да стане херој во финалето. Меѓутоа тој момент не го уништи напаѓачот на психолошки план, туку напротив тоа како да го направи посилен и продолжува да блеска на клупски план каде во досегашниот дел од кампањата има 9 гола и 10 асистенции во дресот на Ајнтрахт Франкфурт во Бундеслигата.

Со оглед на тоа што има 24 години и има простор за дополнител напредок повеќе од јасно е зошто Јунајтед и Ливерпул го посакуваат, ама според „Л’Екип“ на тој пат ги чека една голема пречка. Бундеслигашот бара 100 милиони евра, сума која тешко дека некој би ја платил за Муани без разлика на добрата форма.

Рандал е дете на Нант, а во кариерата има играно и за Булоњ.