Душебаев: Формулата за успех? Игравме со срце на терен

Од Келн за „Дерби“,
Александар Табаковски

Ракометарите на Вардар го победија Пари Сен Жермен со 24-23 и дојдоа до најголемиот успех во својата историја, титулата во Лигата на шампионите.

Со ова се осполни и желбата на шпанскиот репрезентативец Алекс Душебаев кој посакуваше со токму ваков резултат да се прости од „црвено-црните“ и македонската публика.

-Јас кога дојдов тука бев млад перспективен играч, знаев оти ова е амбициозна екипа, дека ова е нација желна за ракомет. Секогаш го посакував најдоброто за Вардар и верувам дека еден ден ќе дојдеме до овој момент. Кога потпишав за Кјелце само посакував да си заминам како херој, како легенда со европска титула и еве тоа се оствари, -рече Душебаев и додаде:

-Ние игравме против двете најдобри екипи на светот и победивме. Формулата за успех? Изигравме со срце на терен, не беше важно кој дава голови, кој асистира, најважна беше екипата и така денеска победивме, -заврши Алекс кој од наредната сезона ќе го носи дресот на полски Кјелце.