Драма во ЛШ: Миовски не реализираше пенал, Џирона загуби со два автогола (Видео)

Бојан Миовски доби ретка шанса да биде во стартниот тим на Џирона од почетокот на сезоната, но ова беше специјален повод за Македонецот, бидејќи мечот против Феенорд за него значеше деби во Лигата на шампиони.

Откако не доби минутажа против ПСЖ, Миовски денеска се најде во стартните 11 на тренерот Мичел, меѓутоа за жал нашиот репрезентативец се претвори во еден од трагичарите за домашниот тим.

Џирона одигра драматичен меч на „Монтиливи“ во Лигата на шампионите во кој видовме се што може да се види на еден натпревар, вклучувајќи пет постигнати гола, еден поништен, но и два нереализирани пенали.

Џирона го постигна својот историски прв гол во европската елита преку Лопез во 19-та минута, а вреди да се напомене дека во акцијата учествуваше и Бојан, кој всушност прв биеше со глава пред топката да стигне до неговиот соиграч.

За жал, шпанскиот тим не ја задржа долго предноста и со автогол на Ерера на семафорот стоеше 1:1, а брзо гостите од Холандија стигнаа и до 1:2 со погодокот на Миламбо. Пред крајот на првиот дел, Уеда не реализираше удар од 11 метри, а второто полувреме стартуваше со два шока за домаќините.

Најпрво му беше поништен гол на Ханко, а Бојан Миовски во 67-та минута доби извонредна шанса да израмни на 2:2 и да го запише првиот гол како член на Џирона. За жал, Македонецот беше прочитан и не реализираше пенал за кој самиот се избори, но тоа што не му успеа нему, му појде од нога на Ван де Бек.

Поранешниот член на Џирона израмни на 2:2 во 74-та минута, но кога се чинеше дека Шпанците фрлаат се на една карта во напад, следеше нов студен туш.

По еден напад од левата страна, центаршутот заврши со автогол на Крејчи во 79-та минута, а ова беше дефинитивен удар за Џирона која го претрпе и вториот пораз во Лигата на шампиони.

Пеналот на Миовски погледнете го ТУКА

Видеото од головите погледнете го ТУКА