„Тешкашот“ Мвумби издоминира со лудиот танц по историската победа на ДР Конго (Видео)

Демократска Република Конго ја дочека првата победа на своето премиерно Светско првенство во историјата, откако денеска стигна до исклучително драматична и тесна победа во пресметката со уште една африканска селекција.

Во рамките од Президент Купот во кој разигруваат тимовите кои беа последни во групите, ДР Конго ги одмери силите со Ангола, селекција која е поискусна со оглед на претходните настапи на мундијалите, но која сепак загуби во еден крајно изедначен меч.

ДР Конго победи со 32:31 и своето прво учество на Светските првенства го зачини со огромна победа и величествена прослава по крајот на средбата, во која во главна улога се најде „дебелкото“ Мвумби кој тежи 137 килограми.

Пикерот на Конго кој стана апсолутен хит на мундијалот веќе ги освои симпатиите во првите три натпревари, а денеска се прикажа со два гола и луд танц во друштво на колегите.