Довчерашен напаѓач на Баерн се сели во МЛС

МЛС клубовите и натаму се обидуваат да ангажираат квалитетни ветерани од најквалитетните европски лиги, а во иднина во американската професионална лига ќе настапува и довчерашен напаѓач на Баерн Минхен.

Се работи за Ерик Максим Чупо-Мотинг, кој еден период имаше важна улога во редовите на Баварците, но германскиот клуб не му понуди продолжување на соработката по крајот на сезоната.

Камерунецот остана без ангажман, а сега агентите му обезбедиле преселба во редовите на Њујорк Ред Булс, што значи дека ќе може да се соочи со играчи против кои играше и во Европа.

35-годишниот Чупо-Мотинг си обезбедил двегодишен договор со пристојни финансиски услови и ќе има нов предизвик во кариерата, во која настапуваше за неколку квалитетни европски клубови.

Пред да биде член на Баерн, Камерунецот настапуваше и за ПСЖ, Стоук, Хамбургер и Шалке 04.