Дончиќ свесен дека не ги исполнува очекувањата: Зарѓан сум, но горд сум што играм за Лејкерс

Лука Дончиќ се уште ја бара својата најдобра форма по паузата која ја имаше поради повреда, но работите станаа доста посложени за него бидејќи се адаптира на нова средина и на нови соиграчи.

Словенецот се уште се бара себеси во редовите на Лос Анџелес Лејкерс и рано утрово одигра навистина лош меч за свои стандарди, за што говори и статистиката која вели дека Лука погоди само една тројка од девет обиди.

Дончиќ постигна 14 поени во натпреварот во кој загуби и шест топки, по што и самиот посочи дека се чувствува доста „зарѓано“ по враќањето на терените.

– Очигледно е дека ми е потребно уште малку време, на мене, но и на целиот тим. Се навикнуваме еден на друг. Зарѓав во последно време после се она што се случи, овојпат го започнав мечот со четири или пет загубени топки, нешто што на ова ниво е недозволиво. Немам право на изговор, морам да почнам да играм кошарка на вистински начин.

– Нозете се уште не ми се во најдобра состојба, тоа ме мачи, но оди на подобро од ден во ден. Моментално се радувам на секој нареден меч, среќен сум што играм за Лејкерс. Ова е еден од најголемите клубови во светот, потребно ми е уште малку време, но горд сум што ги бранам овие бои, – вели Дончиќ.