Дончиќ не тренирал со соиграчите, ќе го пропушти дуелот со Клиперс

Далас ги продолжува настапите во НБА лигата на домашен терен, а прв противник по кратката пауза ќе биде сезонава солидниот тим на Лос Анџелес Клиперс.

Домашните фанови добија разочарувачка вест, која вели дека овој натпревар ќе го пропушти првата ѕвезда Лука Дончиќ, а причина е повреда на скочниот зглоб на левата нога.

Словенецот поради овој проблем не тренирал последните два дена и сега ќе го пропушти соочувањето со Клиперс, а Кајри Ирвинг веројатно ќе биде подготвен за настап иако деновиве и тој се жалел на повреда.

Далас претходно мораше да игра подолг период без Дончиќ и на тие натпревари имаше ефект 5-1, а новата пауза за Лука доаѓа по феноменалниот настап против Голден Стејт, на кој реализираше трипл-дабл со 45 постигнати поени.

Далас во моментов има ефект 17-9, додека Клиперс котираат послабо на табелата со 15 победи и 12 порази.