Долгогодишниот помошник на Гвардиола: Меси ќе дели лекции на друга позиција кога ќе биде побавен

Пеп Гвардиола во повеќе наврати има нагласено дека никогаш повеќе нема да се види играч како Лионел Меси, а истото мислење го дели и неговиот долгогодишен помошник кој му беше десна рака уште во Барселона Б, а потоа и во Барса, Баерн Минхен и Манчестер Сити.

Доменек Торент одлучи пријателски да се раздели со Пеп во 2018-та година и се врати во водите како прв тренер на еден тим откако го презема Њујорк Сити, а како човек кој одблиску ги следеше магиите на Лео Меси, потенцира дека актуелниот капитен на Барселона е неповторлив.

– За мене, Меси е неповторлив. Мислам дека повеќе нема да видиме нешто слично во животот. 15 години игра на високо ниво. Денот кога не е во најдобра форма, тој пак е најдобар. Еден лош меч на Лео се две асистенции и две акции кои завршуваат со гол. Имам видено неверојатни играчи, но никој не се одржал на елитата 15 години во исто темпо.

Доменек кој во овој момент е без работа не застана тука со пофалбите, па дури и вели дека Лео за неколку години ќе може да игра на нова позиција.

– Тој е неверојатно интелигентен играч. Многупати се враќа назад за да ја прими топката. За неколку години, може да игра на друга позиција. Може да игра како Чави и да дели топки како играч за врска. Тој не губи топка, дели асистенции и може добро да се чува за да ја продолжи својата кариера, ќе дели лекции и на таа позиција. Кога ќе загуби дел од брзинта, комотно може да се врати неколку метри назад и да игра како организатор, – порачува Торент.