Документите од собранието на РФМ потврдија дека тренерската лиценца на Лазаров е во постапка

Денешното собрание на РФМ освен потврдениот реизбор на Живко Мукаетов како прв човек на македонскиот ракомет, стимулираше дискусија на тековни актуелни теми.

Мукаетов во своето обраќање истакна дека е добро што Македонија го задржала континуитетот со настапи на големите натпреварувања, но дека „беше болно да се гледа“ она што се случуваше во Египет, при што критикуваше дека одредени ракометари не се залагале доволно за националниот дрес.

Неколку дена пред собранието беше потврдено дека РФМ и досегашниот селектор Брестовац спогодбено го раскинале договорот кој беше на три години, а се реализираа две од него. Со тоа се отвори место за нов селектор, а јавноста во недостаток на друго име со реноме, кокетира со името на актуелниот капитен Кирил Лазаров.

Но, во исто време, РФМ денеска понуди и документ за отчетност во сработеното за периодот 2013-2021 година, во кој се набројани повеќе активности. Во делот за едукација на тренерите забележливо е дека во сезоната одбележана од пандемијата со Ковид-19, единствен кој се одлучил за едукација и добивање таканаречена „мастер-лиценца“ е Кирил Лазаров. Ова не е ништо тајно, бидејќи самиот Лазаров на 22 ноември 2020 година на својата официјална ФБ-страница го сподели интервјуто дадено за „Јутарњи лист“ и „Спортске новости“, каде што најавува тренерска кариера.

Во оваа згода, потсетуваме на дел од прашањата и одговорите на тоа интервју, кое открива дека Лазаров ја студира играта на Шпанија под водство на Жорди Рибера, а дека за свои ментори ги има Лино Червар и Чави Пасквал.

Дали имате намера сами да изградите тренерска кариера?

– Дефинитивно го решив тоа. Вложувам многу во моето образование. Наскоро ќе добијам мастер лиценца за главен тренер по А лиценцата преку ЕХФ на тема „Анализа на натпреварите на Шпанија во финалето на Европското првенство 2020 година во Стокхолм”. Мислам дека по примерот од Жорди Рибера може многу да се научи. Сè оди по својот тек, не се наметнувам никому и не ми се брза. Знам што зборувам и што правам и важно е да изберам вистински момент за тоа. Шанси секогаш има, мислам дека тоа можам да го работам уште утре, но тоа не е суштината на тренерската работа.

Играч денес, тренер утре – функционира ли тоа воопшто реално?

– Има се, освен правила. Има и размислувања од типот: „Не знам што ќе правам по играчката кариера, па ајде да бидам тренер, тоа единствено добро го знам”. Но, тоа не е така едноставно како што изгледа. Мора да се има добар темел, но без надоградување нема напредок. Секој има свој стил. Јас не сум човек од конфликти. Ако тоа се појави, јас бегам од тоа. Секогаш мислам дека постои начин на кој може да го презентирам мојот став како што сакам. Многу разговарам со Лино Червар и Чави Пасквал, кои ми се големи авторитети. Кога ќе дојде време сигурно ќе знам да одберам.

Денес-утре на клупата на ППД Загреб?

– Мислам дека сега не е време, но никогаш не се знае што ќе биде во животот. Реков дека не е проблем да се има понуди и прилики. Знам дека сите би сакале да се тренери во Загреб или во било кој тим во Лигата на шампионите, но за добра работа е потребно малку повеќе, а најмногу да се познаваш себеси и да знаеш да избереш.