Директор на Милан поднел оставка поради несогласувањата со Ибрахимовиќ

Златан Ибрахимовиќ има важна функција во раководството на Милан, но тоа очигледно му носи и конфликтни ситуации со дел од колегите, чија задача исто така е да работат во корист на напредокот на „росонерите“.

Италијанските медиуми тврдат дека досегашниот спортски директор Антонио Д’Отавио решил да поднесе оставка на функцијата, а причина за такво нешто се последните несогласувања со Швеѓанецот.

Д’Отавио е дел од Милан од 2017 година и важеше за најблисок соработник на Џефри Монкада, а со Ибра имал различни ставови во однос на иднината на првиот тим, но и младинските категории.

Милан се уште не ја потврдил информацијата, но медиумите сметаат дека нема многу дилеми околу постоењето на конфликтот и одлуката на Д’Отавио, додека Ибрахимовиќ и останатите директори ќе продолжат да ги извршуваат своите функции.

„Росонерите“ сезонава немаат најдобри резултати во Серија А, а во ЛШ утре ќе бидат фаворити на дуелот со Црвена Звезда.