Димитријевиќ повторно двоцифрен, Реал Мадрид се разбуди во последниот период

Хувентуд добро му парираше на Реал Мадрид се до последниот период, па на крајот сепак загуби (101:92) на тешкото гостување во шпанското кошаркарско првенство.

Ненад Димитријевиќ и неговите соиграчи го добија првиот период со 18:24, имаа плус три и на полувреме, а во последниот период влегоа со предност 78:82.

Реал се разбуди кога најмногу требаше и во последната четвртина реализираше дури 36 поени, со што на крајот стигна до сигурна победа во дуелот со Хувентуд.

Димитријевиќ втор натпревар по ред беше двоцифрен, постигнувајќи 13 поени, како и 3 асистенции за нешто повеќе од 24 минути на теренот.

Рибас со 17 и Брогиански и Морган со 15 поени биле единствените поефикасни од нашиот репрезентативец, додека Љуљ бил најдобар реализатор во редовите на Реал Мадрид со 15 поени.

За Реал ова беше 30-та победа во првенството и има 60 поени на првото место, додека Хувнтуд е седми со 32 поени.