Димитријевиќ одново блескаше во убедливата победа на Уникс

Ненад Димитријевиќ стандардно е меѓу најдобрите играчи на Уникс Казан на било кој натпревар во ВТБ лигата, а играчот кој беше МВП минатата сезона продолжи во ист тренд и денеска.

Македонскиот репрезентативец одигра одличен меч против Астана, па откако доминираше на паркетот, имаше време и да одмори во последната четвртина во која веќе се знаеше победникот.

Актуелниот шампион во ВТБ лигата победи со 96:65, а Нено за 20 минути на паркетот запиша 14 поени, седум асистенции и четири скокови.

Покрај ова, Димитријевиќ украде и две топки во периодот додека беше на теренот, што беше доволно за петта победа на шест одиграни меча во ова натпреварување.

Уникс во моментов е на второто место, а прва е ЦСКА на Емил Рајковиќ која е стопроцентна со „седум од седум“.