Димитријевиќ не настапи, Шортс го украде шоуто и издоминира против Олимпија Милано

Во единствениот натпревар кој се одигра во Евролигата оваа вечер, Париз успеа да го одбрани домашниот терен и да ја победи Олимпија Милано, и тоа во пресметка во која не дојде до дуел меѓу Ти-Џеј Шортс и Ненад Димитријевиќ.

Поради проблеми со повреда, Димитријевиќ не беше дел од составот на гостинскиот тим, па во негово отсуство, шоуто на теренот го украде неговиот соиграч од репрезентацијата.

Шортс блескаше во свој препознатлив стил и го водеше Париз до победа од 92:79, завршувајќи го мечот со 24 поени зад своето име.

Париз доби три од четири четвртини и сосема заслужено ја обезбеди победата, а покрај 24-те поени, Ти-Џеј придодаде и со 6 скокови и 10 асистенции.

Францускиот тим на овој начин ја прекина серијата од три порази во Евролигата, па успеа да стигне до шестото место на табелата.