Димитријевиќ испорача дабл-дабл учинок, Олимпија Милано го доби дербито

Ненад Димитријевиќ со уште едно одлично издание го предводеше тимот на Олимпија Милано до победа, овојпат во италијанскиот шампионат каде беше совладан составот на Венеција со 79:78.

Македонскиот репрезентативец пред неколку дена блескаше против Реал Мадрид во Евролигата, а тој ритам го задржа и во дербито во Лега А каде беше лидер, најдобар играч на „манекените“ со дабл-дабл учинок од 17 поени и 10 асистенции, плус собра и 1 скок.

Домаќините имаа комплетна контрола три четвртини и по 30 минути игра водеа со 66:49, меѓутоа избраниците на Месина одново покажаа слабости кога беше најмалку потребно, се загубија во завршниот период и малку фалеше да бидат шокирани, поразени на крајот во својот дом.

Зад Нено беа Ледеј и Болмаро со по 16 поени, додека пак Кабангеле имаше 18 поени и 11 скока кај поразените.