Димитријевиќ и Хувентуд победнички ја решија драмата со Уникс за „пет од пет“ во Еврокупот

Ненад Димитријевиќ и Хувентуд ja прокнижија и петтата победа во Еврокупот, а најнова жртва им беше рускиот претставник Уникс Казањ кого го совладаа на негов терен со 93-91.

Гостите од Бадалона на оваа средба настапија без двајца важни играчи Пау Рибас и Анте Томиќ, но и без нив Хувентуд уште еднаш потврди дека е одличен колектив, тим во кој владее добра хемија и по една вистинска драма и дополнителни пет минути славеше на ова тешко гостување за пет од пет во ова натпреварување.

Домаќините се изборија за продолжение со кошот на Кенан на 10 секунди до крајот, но во дополнителните пет минути Нено и компанија одново одиграа силно и си ја завршија работата.

Македонскиот репрезентативец со 17 поени беше меѓу најдобрите кај победниците, втор стрелец зад Броџиански со 20 кошеви. На домаќините залудни им беа 23 поени на Морган.

Хувентуд во следното коло гостува во Белград кај Партизан.