Димитриевски се огласи за својата иднина и го посочи главниот приоритет

Столе Димитриевски ги брои последните месеци од договорот со Рајо Валјекано, а иако веќе некое време неговите агенти преговараат со клубот за продолжување на соработката, засега се уште не е ништо дефинирано.

Тоа остава простор за многу шпекулации со оглед на тоа што Македонецот е еден од голманите кои бранат во најдобра форма во Ла Лига, па последно беше пренесено дека Валенсија будно ја следи ситуацијата на Столе и го има пикирано како наследник на Мамардашвили.

Покрај Валенсија, заинтересирани за потпис на Димитриевски се и Севилја и Вилјареал, но македонскиот репрезентативец сега самиот вели дека најголема предност му дава на својот актуелен клуб.

– Мојата првична идеја отсекогаш е да останам во клубот уште многу години и да ја завршам кариерата тука. Се уште зборуваме и траат конверзациите и ќе останам во Рарјо ако постигнеме договор. Од моја страна, постојат 90 проценти шанси да останам во Рајо, но треба да го прашате и претседателот на клубот за останатите проценти. Во овие преговори секогаш има две страни.

– Потребно е да постигнеме договор за да останам тука со години. Немам понуди од други клубови на маса и мој приоритет е Рајо. Секогаш има многу гласини, но ве уверувам дека немам потпишано ништо со друг клуб, – гласи изјавата на Столе дадена за „Pasión por el Rayo“.