Димитриевски: Би потпишал доживотен договор со Рајо, сега сакаме победа над Реал!

Македонскиот репрезентативец, Столе Димитриевски веќе долго време е во Шпанија со тоа што најдобрите партии ги имаше во Рајо Валјекано, клуб во кој настапува од 2018 година.

Столе е многу важен дел од составот од Мадрид, незаменлив е на голманската позиција и постои голема взаемна почит која најдобро се гледа по последната изјава на нашиот ас кој порача дека би сакал да остане во сегашната средина до крајот на животот.

-Јас им кажав во клубот дека сакам да останам. Ако треба да потпишам договор до 2029 година – ќе потпишам! Ако треба да потпишам договор до почеток на тренерска кариера – ќе го сторам тоа. Ако треба да останам до крајот на животот – ќе потпишам. Јас сум многу благодарен на овој клуб, тука се чувствувам прекрасно. Тука ме ценат, ми дадоа шанса и јас се обидувам секогаш да до дадам најдоброто од себе за клубот. Многу сум благодарен и среќен. Ние имаме договор, но јас не сакам да ги притискам. Зашто да не завршам тука? Тоа ми е идеата. Ако треба да останам уште 10 години да ги ‘мачам’, ќе ми биде задоволство, -вели Димитриевски кој се надева дека со Рајо ќе излезе во Европа со тоа што мора да се освојуваат бодови почнувајќи од утрешниот меч со Реал Мадрид на „Сантијаго Бернабеу“.

-За да го победиме Реал треба да сме на најдобро ниво, но можеме и ќе се бориме до крај. Во соблекувалната сите сонуваат меч Рајо Валјекано – Ливерпул, -порачува Македоенцот.

Димитриевски има договор со Рајо до 30 јуни 2024 година.