Димарко го „пецна“ Сити пред финалето во Истанбул: Трофејот за нас е сон, а за нив опсесија

Во сабота се закружува оваа сезона во Лигата на шампионите и тоа со финалето во Истанбул во кое за трофејот ќе се борат англискиот првак Манчестер Сити и калчолигашот Интер.

Сити има желба конечно да дојде до првиот трофеј во елитното натпреварување и на тој начин со тројна круна да ја заврши кампањата со што на тој начин ќе го повтори успехот на градскиот ривал Манчестер Јунајтед.

Од друга страна пак „нероаѕурите“ имаат можност за првпат по 2010 година да бида на врвот на европскиот фудбал и со тоа да ја комплетираат неверојатната година во ова натпреварување.

На хартија премиерлигашот е фаворит, меѓутоа тоа ќе мора да го потврди и на теренот каде италијанците најавуваат голема борба, па Федерико Димарко малку и го „пецна“ англискиот претставник.

-Многу сме среќни што ја постигнавме оваа цел, ова го заслуживме поради се што направивме на теренот. Знаеме дека играме против силен тим, но за нас ова финале, освојување на трофејот е сон. За нив тоа е опсесија, -рече дефанзивецот и продолжи:

-Не може секој да ја мине групата во која се Баерн или Барселона и нормално е да се менуваат прогнозите. Игравме против силни екипи и со настапите на теренот покажавме дека заслужуваме да бидеме во финалето, а во натпреварот влегуваме со еднакви шанси. Тие се многу силни, тоа го знаеме. Сепак, Интер мора да биде Интер, мораме да ја вложиме сета наша гордост и сите сили во него. Ако одиграме како што Интер треба да игра, можеме да успееме, -заклучи Федерико.