Дибала за последен пат го напушти Тригорија центарот, поранешниот агент откри зошто си заминува од Рома (Видео)

Рома му даде зелено светло на Пауло Дибала да преговара со Ал Кадсијах од Саудиска Арабија, по што стана јасно дека клубот од италијанската престолнина е подготвен да остане без својата голема ѕвезда.

Последните информации од Италија велат дека е се договорено и дека Дибала денеска за последен пат се поздравил со своите соиграчи од Рома, пред да замине за Саудиска Арабија каде ќе заработи 75 милиони евра за три години.

Богатата понудата беше доволно атрактивна за да биде прифатена, без оглед на тоа што Пауло во оваа фаза од кариерата се откажува да игра фудбал на најврвно ниво.

Аргентинецот има 30 години и неговото заминување значи дека Рома ќе се ослободи од огромна плата, па со освежување на својот буџет ќе може да си дозволи и атрактивно засилување.

Планот е Де Роси да добие адекватна замена до крајот на летниот преоден рок, но без оглед на се, фановите на Рома се покажаа како големи џентлмени и му се заблагодарија на Дибала за се што направи за клубот во изминатите две години.

Дибала пристигна како голема ѕвезда на „Олимпико“ и во Рим беше пречекан како император, спомени кои сигурно ќе ги памети до крајот на животот.

Во меѓувреме, со изјава за заминувањето на Аргентинецот се јави и неговиот поранешен агент, кој смета дека Пауло прифатил трансфер во Саудиска Арабија бидејќи се намалило неговото значење во тимот на Де Роси.

– Пауло е човек кој мора да се чувствува во центарот на проектот, сака се да се врти околу него. Кога некој ќе ја намали вербата во него, вие губите 50 проценти од Дибала како играч, но и како човек. Очигледно, тој не добил позитивни сигнали на состанокот со тренерот на Рома, па на крајот претпочита да заработи огромни пари, наместо да биде играч плус во тимот на Рома, – вели Клауди Анелучи, некогашниот агент на Аргентинецот.

Dybala leaves Roma’s training ground for the final time ahead of his move to Saudi Arabia 🥹

🎥 @LAROMA24 pic.twitter.com/Hgn7VrL0Yr

— Italian Football TV (@IFTVofficial) August 22, 2024