Дибала: Сакав да умрам за време на прославата на титулата на Аргентина

Репрезентацијата на Аргентина по долго време дојде до пехар на најголемата фудбалска сцена, Светското првенство кое се одржуваше во Катар.

Аргентинците чекаа нова победничка генерација уште од времето на легендарниот Диего Армандо Марадона, па успехот на Мундијалот донесе голема експлозија, неизмерна радост, многу емоции. Избраниците на Лионел Скалони по едно супер финале  славеа над Франција и до 2026 година ќе ја имаат круната, статусот на најдобра селекција на планетава.

Многу работи требаше да минат „гаучосите“ за да стигнат до пехарот, успехот кој вечно ќе го паметат. Видовме безброј ситуации, моменти фатени од камерите, спомени, моменти раскажани од самите актери, но има и некои работи кои допрва ќе се откриваат како што е ситуацијата со Пауло Дибала и Кристијан Ромеро.

Фудбалерот на Рома обелодени дека не можел во прв момент убаво да прослави, а причината за тоа е допинг контролата.

-Кога заврши натпреварот, почнавме да славиме во соблекувалната. Трчав, но потоа пристигна еден голем човек кој рече „Допинг, допинг“.

-Кога стигнав таму, ја отворив вратата, но никој немаше внатре. Се обидов повторно и го видов Ел Кути [Ромеро]. Сакавме да умреме затоа што ја пропуштавме прославата, -вели Пауло за „Тик Спортс“.