Дибала: Испративме порака, нема егоизам во Рома

Рома ја забележа првата победа во Серија А и тоа во 4. коло во соочувањето со Емполи кој настрада на „Олимпико“.

Домашниот тим славеше со 7-0 и со тоа најави подобри резултати, изданија во продолжението на сезоната. Пауло Дибала беше единствениот кој постигна два гола на дуелот и тоа беше важно како за него така и за тимот.

-Ние секако требаше да испратиме порака, да промениме нешто и секој од нас се обиде да се жртвува давајќи нешто повеќе. Мислам дека тоа го направивме вечерва. Среќен сум со доаѓањето на Лукаку, Азмун, Н’Дика и сите нови засилувања. Зборував со тренерот и се обидов да се вратам во форма за време на репрезентативната пауза, добро се чувствувам денеска, -порача Аргентинецот кој смета дека нема да има проблем со Ромелу Лукаку околу изведувањето на ударите од 11 метри.

-Тука нема егоизам, кој чувствува дека сака да го изведе пеналот ќе го изведе. Јас ќе земам некои, а некои ќе бидат за моите соиграчи, порача напаѓачот за „ДАЗН“.