Дешамп: Луѓето се изморија да го гледаат моето лице

Франција успеа да и се реваншира на Италија и со идентични 1:3 славеше среде Милано, па така „триколорите“ се тие кои завршија први во оваа група во Лигата на нации.

Тоа значи дека Французите ќе чекаат противник во четвртфиналето од привилегирана позиција, додека Италија на хартија ќе добие малку потежок ривал за пласман во полуфиналето.

– Научивме важна лекција од првиот меч кој го загубивме од Италија и сега не ги повторивме грешките. Овој тим на Франција е многу млад, но има голем квалитет и го докажавме тоа, – изјави селекторот Дешамп, кој во последно време е под постојан притисок од француските медиуми.

– Никој не може да направи да ги загубам фокусот и смиреноста. Пред неколку дена не го победивме Израел, но тој Израел сега ја победи Белгија. Франција е при врвот десетина години и тешко е да се одржи тоа темпо.

– Исто така, полека сфаќам дека 12 години сум тренер на овој тим, па станува неизбежно луѓето да бидат изморени од моето лице. Јас морам да се дистанцирам од се што доаѓа отстрана и да се фокусирам само на играчите во соблекувалната. Ми покажаа дека имаат квалитет и само тоа ми е важно, – изјави Дешамп.