Дешамп го избрал новиот француски капитен

Повлекувањето на Иго Лорис од националниот тим го врати на дневен ред капитенското прашање во француската репрезентација, па селекторот Дидие Дешамп мораше да пресече пред почетокот на квалификациите за ЕП.

Селекторот најави дека има неколку кандидати и првично сака да поразговара со нив, а според „Лекип“, на крајот изборот паднал на Килијан Мбапе.

– Мбапе има повеќе квалитети, а еден од нив му е добрата комуникација со соиграчите, – изјави Дешамп по првиот собир на националниот тим.

„Лекип“ пренесува дека одлуката наскоро ќе биде официјално потврдена, по што Мбапе ќе биде нов лидер на селекцијата која играше во финалето на последното СП.

24-годишниот Мбапе има 66 настапи и 36 гола во дресот на националниот тим.