Денес е „Денот Д“ за италијанскиот фудбал: Наскоро ќе се знае дали сезоната во Серија А ќе продолжи

Италијанските клубови веќе одреден период се подготвуваат во пресрет на евентуалното продолжување на сезоната во Серија А.

Се уште не е познато дали тоа ќе се случи, но работите ќе станат многу појасни по денешната видеоконференција која ќе ја води италијанскиот министер за спорт, Винченцо Спадафора.

Состанокот на кој се очекува конечната одлука ќе започне во 18:30 часот и веќе околу 20:00 часот ќе треба да се знаат сите детали околу рестартирањето на фудбалот на Апенините.

Медиумите на „чизмата“ пишуваат дека извесно е дека фудбалот ќе продолжи, но се уште не е познато кога ќе се случи тоа.

Во игра се два датуми и тоа 13 јуни и 20 јуни, а се чини дека вториот барем засега изгледа како најреална опција.

Освен првенството, во Италија ќе се одигра и купот, а во моментов се разгледува опција прво да продолжат натпреварите од Купот, а потоа да започне првенството.

Одговори на овие, но и на други прашања поврзани околу протколите ќе се дознаат вечерва по крајот на состанокот.