Демировиќ нагласи дека е подготвен за „одвратната Маракана“, па даде објаснување за својата изјава (Фото)

Црвена Звезда се уште чека на први бодови во тековната сезона во Лигата на шампиони, а следна шанса за да го промени салдото ќе биде натпреварот против Штутгарт кој се игра во среда.

Српскиот првак ќе игра против тимот кој игра офанзивен и допадлив фудбал втора сезона по ред, но покрај стандардните најави на овој натпревар, Ермедин Демировиќ со едно интервју во Германија направи истиот да добие и националистичка страна.

Регионалните медиуми ја пренесоа изјавата која ја дал Босанецот во интервју за „Кикер“, па откако се крена голем прав во српската јавност, Демировиќ мораше да излезе со објаснување на социјалните мрежи.

– Подготвен сум за мечот со Звезда, кој лично за мене може да биде тежок поради националноста. Може да биде посебно, но може да биде и одвратно на Маракана. Тие одлучуваат во кој правец ќе оди атмосферата….

– Или ќе биде срање, или воопшто нема да се занимаваат со мојата националност. Подготвен сум и за едното и за другото. Такви работи може дополнително да ве мотивираат. Уште при извлечената ждрепка, посебно се радував што ќе играм во Белград. Тоа е забавен предизвик за мене, но во секој случај ќе биде тешко гостување, – изјавил Демировиќ во Германија, по што денеска мораше да се поправа.

– Во оваа прилика сакам да ја известам јавноста, а особено навивачите на Црвена Звезда дека никогаш со моите изјави и ставови не сакав да го навредам нивниот клуб. Црвена Звезда е еден од најголемите клубови на нашите простори и имам голема почит кон него. Исто така, Маракана е стадион на кој се радувам што ќе играм, особено поради тоа што е познат по одличната атмосфера.

– Некои мои изјави во германските медиуми не беа најдобро преведени и не сакам да се сведува национален контекст, поготово бидејќи сум спортист кој не се занимава со работи. Спортски поздрав, – порача Демировиќ.