„Делиите“ се појавија во Милано и испорачаа мотивациски говор за играчите на Црвена Звезда (Видео)

Фудбалерите на Црвена Звезда вечерва имаат тешко гостување кај италијанскиот шампион Интер, а на оваа средба нема да имаат поддршка ниту од своите најверни навивачи.

Италијанците забранија присуство на „Делиите“ на „Сан Сиро“ во обид да спречат инциденти, пред, за време и по натпреварот, па официјално „црвено-белите“ не можеа да продаваат билети за овој дуел од Лигата на шампионите.

Но, тоа не спречи голема група фанови сепак да пристигнат во Милано и синоќа да остварат средба со фудбалерите на српскиот шампион и тоа пред нивниот хотел.

Водачот на групата одржал мотивациски говор, во кој потенцирал дека тој и сите присутни во Милано ќе поминат вкупно 2500 километри само за да ја пренесат пораката на навивачите, а таа е дека Црвена Звезда знае и треба да игра фудбал и покрај квалитетот на противникот.

– Ајде, немојте со такви тажни фаци, луѓево ќе поминат 2500 км во два правци само да ве поддржат, утре не можат да влезат на натпреварот поради законот, поради полицијата, на која штотуку и пеевме. Тие дојдоа само да ве поддржат, за кога ќе излезете на терен, да нема од што да се плашите, одиграјте добар натпревар. Веројатно бевте подобар противник против Бенфика, но не испадна добро, утре играјте на ист начин.

– Немате од што да се плашите, имате силен противник, но нека ви бидат во глава луѓето кои поминаа 2500 километри само за да ве поддржат овде. Уште нешто да имате на ум, ако не се плашеше цела Италија од Црвена звезда и нејзините навивачи, утре сигурно ќе имаше 5000-6000 луѓе на стадион, тоа ви го гарантирам. Но бидејќи цела Италија се плашеше од Црвена звезда, која е огромен клуб, и нејзините навивачи, покажете им дека се плашеле со причина. И не плашете се од ништо, знаете да играте фудбал, ние сме со вас. Ние толку можеме сега, – рекол предводникот на Делиите во Милано.