Де Роси за тактичката лекција која му ја одржа на Де Ѕерби: Мора да признаам дека ги полудев играчите

Рома игра страшно офанзивен фудбал под водство на Даниеле Де Роси и тоа е целосен контраст од истиот тим кој играше под водство на Жозе Мурињо пред два месеци, па токму поради тоа легендарниот капитен на „волчицата“ добива серија пофалби од јавноста.

По победата од 4:0 над Брајтон во Лигата на Европа, Де Роси го забележа осмиот триумф како тренер на Рома, а притоа има само едно реми и еден пораз и вкупна гол разлика од 26:11.

Овие бројки се навистина импресивни за тим кој Жозе со месеци велеше дека е играчки лимитиран, па неговите тврдења полека пропаѓаат во вода, особено поради тоа што самиот Де Роси вели дека овие фудбалери се крајно талентирани и можат уште повеќе.

– Не направив ништо посебно откако дојдов, мислам дека само ги доведов работите во ред и многу сум среќен. Играчите кои ги пронајдов тука се многу добри и многу талентирани. Го велам ова од првиот ден, мора да победуваме на натпревари на кои Рома треба да победи. Ние сме одличен тим и треба да победуваме, не правиме ништо специјално.

– Во 2024-та година мора да трчате на фудбалскиот терен, а мора да признаам дека овие фудбалери ми даваат навистина добар одговор на тоа поле, – изјави Де Роси, кој потоа доби прашање како е чувството да му се одржи лекција на човек кој го смета за свој пријател.

– Нема да кријам, пресреќен сум од нашите перформанси, имаше многу работи што ми се допаднаа, но во вториот дел можевме да бидеме и подобри. Го сакам Де Ѕерби, за да подготвите меч против негов тим, мора да работите двапати понапорно. Го направив тоа и мора да признаам дека ги полудев моите играчи, – заврши Де Роси.