Де Роси за можното заминување на Дибала: Ќе бидам преплашен само во еден случај

Рома стартуваше со реми против Калјари во новата сезона во Серија А и не се прикажа во најдобро можно светло, но тренерот Даниеле Де Роси по мечот без голови одново мораше да одговара на прашањата за Пауло Дибала.

Аргентинецот веќе не е недопирлив во системот на Де Роси и вчера го почна мечот на клупата за резерви, па иако се очекуваше и воопшто да не добие шанса, Пауло сепак играше во завршницата.

И покрај тоа што се уште стои на располагање на тимот, се верува дека Дибала во наредниот период ќе го комплетира изненадувачкиот трансфер во Саудиска Арабија, нешто од што не е преплашен тренерот на Рома.

Де Роси смета дека тимот може да продолжи напред без било кој играч во тимот, а според него ќе има место за паника само ако клубот не донесе резерва за Аргентинецот.

– Веќе зборував доволно на оваа тема и немам многу што да додадам. Ќе зборуваме за нашиот трансфер пазар после 1-ви септември. Ако Пауло на крајот си замине, или било кој друг, потребно е да добиеме замена за него. Ќе бидам преплашен само во еден случај, само ако играчот кој си оди не биде заменет со достоен фудбалер, – изјави Де Роси.