Де Роси го избра најтешкиот противник од својата играчка кариера: Можев да се носам со сите, но не и со него

Даниеле Де Роси умешно успева да ги избегне прашањата за неговиот отказ во Рома и засега се уште не излегува со контра-реплики за членовите од семејството Фридкин, но тоа не значи дека не е достапен за медиумите.

Поранешниот капитен на Рома во интервјуто за „Спорт Ток Индустри“ говорел за актуелните играчи кои се најдобри на неговата природна позиција и за времето кое тој го имаше како професионален фудбалер, при што не пропуштил да додели неколку коментари за најтешкиот ривал во кариерата.

Де Роси е убеден дека Родри е убедливо најдобар играч за врска во овој момент, но навраќајќи се низ годините, го избра Кларенс Сидорф за најтежок ривал во неговата фантастична кариера.

– Франческо Тоти беше најдобриот играч со кого играв, имавме можност да ја делиме соблекувалната со години. Тој беше најдобриот и најфасцинантен фудбалер.

– Кога се во прашање ривалите, јас бев фасциниран од Зидан, беше убаво да се гледа колку е елегантен. Сепак, најтешкиот противник беше Сидорф. Можев да се носам со секој играч, можев да го маркирам било кој играч, но не и Сидорф. Тој беше физички посилен, технички поткован и побрзо размислуваше од другите, – вели Де Роси.