Де Лаурентис со поддршка со Конте: Имавме супер тренинг со Лацио, можеме да си дозволиме експериментирање

Наполи не игра во европските купови во оваа сезона, па очекувањата беа дека клубот сериозно ќе ги сфати сите домашни натпреварувања.

На наполитанците добро им оди во Серија А и се очекуваше да притиснат и во Купот, но тренерот Антонио Конте се реши да ротира против Лацио, потег кој не донесе резултат и екипата доживеа пораз од 3-1 и елиминација.

Имаше критики за Конте од страна на медиумите поради потценување на натпреварувањето, сигурно одредено незадоволство има и кај дел од навивачите, ама претседателот Аурелио Де Лаурентис го поддржува стратегот.

-Се согласувам со него, беше апсолутно во право што употреби 11 различни играчи. Тоа беше супер тренинг против Лацио и животна лекција за тимот, -рече Де Лаурентис и додаде:

-Знаевме дека со толку промени, нема да биде лесно, јасно е дека ако задрживме повеќе од вообичаените 11, тогаш ќе беше поизбалансиран натпревар. Тренерот требаше да им даде простор на другите играчи и тоа го направи. Резултатот не е важен. Можеме да си дозволиме експериментирање, како Конте против Лацио, -порача првиот човек на калчолигашот.

Ова значи дека Наполи се фрла на една карта, настапот во лигата и трката по Скудетото.