Де Лаурентис: Оваа сезона ја доживеав и најлошата ноќ во 18-годишното владеење во Наполи

Аурелио Де Лаурентис оваа вечер откри дека неговата листа на потенцијални кандидат за тренер на Наполи се зголемила од 22 на 40 имиња, па и самиот вели дека ќе му биде многу тешко да го избере наследникот на Лучијано Спалети.

Де Лаурентис оваа сезона го доживеа најголемиот успех во 18-годишното владеење во Наполи и тимот за првпат ја освои титулата во Серија А после повеќе од три децении, но контроверзниот газда на клубот вели дека оваа сезона го доживеал и најголемото разочарување.

Интересно, не се работи за елиминацијата од Милан во четвртфиналето во Лигата на шампионите, туку за поразот кој го претрпе Наполи во Серија А од истиот ривал со 0:4.

– Не бев толку лут за елиминацијата од Милан во Лигата на шампионите, бев бесен на натпреварот кој го одигравме против нив во Серија А, загубивме на толку лош начин. Бевме целосно деконцентрирани, не може да загубите така од ривал кој е толку многу зад вас на табелата. Може да загубите со грешки на ВАР, со судиски грешки, промашивме и пенал против нив во Лигата на шампиони, но на мечот во Серија А не личевме на тим.

– Тоа беше комплетно неприфатливо и мразам кога луѓето велат дека „може да се има и таков ден“. Не, не треба да имате таков ден. Таа ноќ беше најлошото искуство кое го имав во Наполи во изминативе 18 години, не сакам да гледам како навивачите порано го напуштаат стадионот, – вели Де Лаурентис.