Де Лаурентис комплетираше изненадување и се реши за втората тренерска опција, Тудор остана без ангажман

Аурлио Де Лаурентис е крајно непредвидлив и секогаш носи големи изенандувања со себе, а тоа го потврди и во потрагата по наследник на Руди Гарсија кој веќе е минато на „Диего Армандо Марадона“.

Францускиот стручњак не ги исполни очекувањата и многу брзо заработи отказ од газдата на Наполи, кој сега верува дека само искусен стручњак може да му помогне на актуелниот италијански шампион.

Де Лаурентис прво го контактираше Игор Тудор и вчера се состана со Хрватот, но средбата заврши без постигнат договор, што направи да видиме и голем пресврт во потрагата по наследник на Гарсија.

Тудор не се согласил да стави потпис на договор кој важи само крајот на сезоната и побарал двегодишна соработка, но овој услов на Хрватот на крајот го натера Де Лаурентис експресно да го договори Валтер Мацари.

Италијаските медиуми уште ова утро пренесоа дека Де Лаурентис има закажано средба со 62-годишниот стручњак, којпак без проблеми и размислување го прифатил условот на газдата на Наполи и сега ќе стане нов тренер на Елиф Елмас и соиграчите.

Ди Марцио прв ја пренесе веста за нивниот состанок, а сега исто така прв известува дека договорот е постигнат и дека Мацари ќе ја започне својата втора авантура во клубот по онаа успешната од 2009-та до 2013-та година.