Де Брујне сам обелодени дали ќе може да настапи на клучниот меч против Вест Хем

Кевин Де Брујне вчера повторно беше клучен фактор во една голема победа на Манчестер Сити, бидејќи токму Белгиецот го проигра Ерлинг Халанд при водечкиот гол за шампионот во Северен Лондон.

Офанзивниот фудбалер го пронајде Халанд кој без проблеми ја смести топката во мрежа, а после голот за 0:1, беше јасно дека гостите од Манчестер се многу поблиску до посакуваната цел.

До крајот на мечот, Халанд постигна и втор гол од пенал за 0:2, додека Де Брујне не можеше да го доигра мечот бидејќи заработи повреда и беше изваден од Пеп Гвардиола.

Белгиецот беше нагазнат и доби непријатен удар, но сега самиот ги смири фановите и најави дека најверојатно ќе може да настапи на натпреварот во последното коло против Вест Хем.

– Мислам дека сум добро. Стапалото ми е отечено, но се е во ред. Во прв момент се почувствував како некој да ме прободе со нош, но тоа е само удар, не е ништо лошо. Ќе бидам добар за недела, – изјави Де Брујне за „Скај Спортс“.