Де Брујне предвидува голем проблем за една година: Парите се позвучни од гласот на фудбалерите!

Кевин Де Брујне се поврзуваше со трансфер во Саудиска Арабија на почетокот на ова лето, но такви гласини брзо стивнаа и белгискиот репрезентативец ќе го гледаме во тимот на Пеп Гвардиола најмалку уште една сезона.

Де Брујне продолжи онаму кадешто застана минатата сезона и повторно е клучен играч во системот на шпанскиот стручњак, но во меѓувреме, остана речиси единствената голема ѕвезда која ја претставува репрезентацијата на Белгија на сите големи настани.

Де Брујне вчера постигна два гола против Израел и уште еднаш ја потврди својата класа, но по мечот говорел за напорната сезона која следи во Европа, а која ќе заврши и со нов формат на Светското клупско првенство.

– Можеби оваа сезона ќе ја завршиме како што треба, но главниот проблем ќе следи догодина на стартот на сезоната. Знаеме дека од финалето на Светското клупско првенство до првото коло во Премиер лигата ќе одминат само три недели. Следната година очекувам проблеми.

– Асоцијацијата за професионални фудбалери бара решенија за да се реши проблемот, но ФИФА и УЕФА само додаваат екстра натпревари. Колку и да покажуваме загриженост, засега нема никакво решение. Изгледа дека парите се позвучни од гласот на фудбалерите, – изјави Де Брујне.