Де Брујне ја посочи најбезвредната статистика која се форсира во фудбалот: Тоа е бескорисно!

Точноста на пасовите е една од статистиките кои повремено знаат да предизвикаат големо воодушевување кај фудбалските фанови, особено ако станува збор за играч од средниот ред.

Модерната технологија им овозможи на специјализираните компании кои водат статистика да вадат интересни бројки, па иако со „успешноста на точни додавања“ им се дава големо значење на најдобрите креатори, Кевин Де Брујне не е импресиониран од таквиот тренд.

Белгиецот важи за еден од играчите кои прават најголема разлика во завршната третина од теренот, но поради ризиците кои ги презема, тој често знае да има и погрешни пасови.

Тоа прави неговата статистика за „точни пасови“ никогаш да не биде перфектна, па затоа смета дека бројките кои се форсираат во јавноста се безвредни.

– Според мене, статистиката за „успешни и точни додавања“ е најбескорисна во светот на фудбалот. Тоа е статистика која е безвредна. Можам да имам и 96 проценти точни додавања, а да не бидам опасен за противникот. Тоа значи дека не сум направил ништо, навистина не знам која е логиката да се форсира таа статистика, – вели Де Брујне.