Далиќ за фантастичниот Гвардиол: Игра вака со 20 години, тој е најдобар стопер на светот

Хрватска избори пласман во осминафиналето на Светското првенство и тоа откако се избори за позитивен резултат против Белгија.

На „коцкестите“ им беше потребен само бод за да ја минат групната фаза, цел која успеаа да ја остварат играјќи 0-0 против „црвените ѓаволи“. Еден од најзаслужните за ова реми беше стоперот Јошко Гвардиол кој одигра на навистина високо ниво и уште еднаш потврди зошто се смета за еден од најталентираните играчи на својата позиција на светот.

-Би било себично да се издвојат поединци, секој даде се од себе. Имавме ситуации во кои Перишиќ и Модриќ спасуваа гол. Според мене Гвардиол е најдобриот стопер во светот. На 20 години да игра вака… Неколку пати ја изнесуваше топката со таква леснотија и елеганција, -истакна селекторот Златко Далиќ кој жали што Роберто Мартинез ја напушта селекторската функција во Белгија.

-Мислам дека Белгија загуби голем стручњак. Жал ми е што поднесе оставка. Мојот проект е ЕП 2024 и финалето на Лигата на нации. Кога ќе ги завршам тие проекти, тогаш ќе размислувам како понатаму, -рече Далиќ.