Далиќ извади играч на полувреме и порача: Три дена зборувавме едно, а тој правеше нешто друго

Златко Далиќ ја промени формацијата во Хрватска на стартот на новото издание на Лигата на нации, но веќе на полувреме реши да менува и извади играч од одбраната по само 45 минути.

Хрватскиот селектор се реши за формација со три стопери и збогатен среден ред со пет фудбалери, но бидејќи тоа не донесе резултат на гостувањето во Лисабон, Далиќ уште на полувреме го извади Марин Понграчиќ.

Централниот дефанзивец направи неколку грешки и загуби топки на чувствителен дел од теренот, а Далиќ беше доволно искрен и призна дека го извадил поради лошото издание во овој период.

– Не стануваше збор за повреда, го извадив Марин бидејќи имаше многу лоши реакции од негова страна. Изгледаше доста бавно за темпото на овој натпревар.

– Имаше многу повлекувања од негова страна, лоши излегувања кон топка. При првиот гол реагираше навистина многу лошо, три дена зборувавме дека последната линија не може да остане сама и дека мора да излезе повисоко на играч. Наместо да го прави тоа, тој ги оставаше противниците во ситуација еден на еден. Во првото полувреме не функционираше речиси ништо генерално, но тој се издвојуваше, – изјави Далиќ по поразот од 2:1.