ЦСКА не успеа повторно да го изненади европскиот шампион, Ристовска имаше квалитетна партија

Составот на ЦСКА Москва од кој дел е Сара Ристовска не успеа да направи второ изненадување против европскиот шампион Кристијансанд и попладнево загуби со 32-28 во средбата од 10. коло од групата Б во Лигата на шампионите.

Норвешкиот претставник влезе далеку поподготвено и од самиот почеток беше тој кој го контролираше темпото и резултатот. Првиот дел го реши со плус три (16-13), додека во второто полувреме водеше и со шест разлика за да на крајот се заврши со победа од четири голови.

Јерабкова со 8 гола беше најефикасна кај победникот, Грос пак со 9 кај поразените и воедно на средбата.

Македонската репрезентативка Ристовска се прикажа во добро светло и даде четири погодоци од шест обиди.

ЦСКА Москва со 10 бода е на 5 место на табелата, следното коло носи пресметка со Савехов во Шведска.