Црн Дрим го изненади МЗТ, Куманово со одлична завршница против Вардар

МЗТ Скопје неочекувано загуби на гостувањето кај фенерџијата Црн Дрим Грин мобил (90:88) и со пораз го заврши првиот дел од сезоната во македонското кошаркарско првенство.

Стружани уште од почетокот покажаа дека се расположени и одат на победа против фаворитот и на полувреме водеа со шест поени разлика.

МЗТ го возврати ударот во третиот период, кој скопскиот состав го доби со 30:18, па последната четвртина започна со резултат 66:72 во корист на избраниците на Дарко Радуловиќ.

Но и тоа не ги откажа кошаркарите на Црн Дрим, па откако се вратија во игра, одиграа подобро во финишот и на крајот славеа со 90:88, а решавачките поени ги постигна Настовски.

За Црн Дрим Грин мобил тоа е само втора победа во цела сезона, додека МЗТ со овој пораз ќе стартува од четвртото место во плејофот.

Стаменковиќ со 21 и Соколовиќ со 17 поени биле најефикасни во победничката екипа, додека кај МЗТ, Бојиќ реализирал 20 поени.

Претходно, Куманово го победи Вардар со 112:78, но убедливата предност ја обезбеди во завршниот период, бидејќи тој започна со резултат 75:69.

Ѓекиќ со 29 поени бил најефикасен во домашниот состав, а Дикембе постигнал 26 во редовите на Вардар.