Чурлинов: Тимскиот квалитет е најважен во репрезентацијата

Дарко Чурлинов пристигнува во извонредна форма во репрезентацијата и со голема мотивација ги чека двата натпревари на домашен терен, односно дуелите против Ерменија и Фарски Острови.

Офанзивното крило одлично се снајде во Јагелонија и се истакнува со своите настапи, па откако го пропушти октомврискиот циклус, сега со голем мотив влегува во натпреварите кои ќе ги играме на домашен терен.

– Играме два натпревари на домашен терен и тоа е голема мотивација за нас. Ќе ги анализираме двата ривали и ќе се фокусираме на инструкциите кои ќе ги добиеме од селекторот.

– За секој фудбалер важи истото, нема поголема мотивација од тоа да играше за својата репрезентација. Сите веруваме во себе и веруваме во добри резултати.

– Во фудбалот веќе нема лесни натпревари, сите екипи се на речиси исто ниво и сите знаат да играат фудбал. Мора да влеземе со максимален ангажман. Имаме голема самодоверба и сакаме да ја одработиме задачата која ја имаме пред себе. Имаме индивидуален квалитет, но тимскиот квалитет е поважен, – изјави Чурлинов.