Чуамени: Имаме проблем со само еден играч од Мајорка

Орелијан Чуамени не го доигра вчерашното полуфинале против Мајорка поради повреда на стартот на вториот дел, но францускиот репрезентативец е сигурен дека не станува збор за ништо сериозно и дека ќе конкурира за настап во финалето против Барселона.

Реал Мадрид ги постигна трите гола во мрежата на Мајорка во ситуација кога Чуамени веќе не беше на теренот, меѓутоа играчот за врска кој принудно игра како стопер беше еден од првите кои дадоа изјави за мешаницата по крајот на мечот.

Чуамени виновникот во целата збрка на теренот го бара само кај еден фудбалер, односно кај Пабло Мафео кој е познат по своите провокации кога има натпревари меѓу Мајорка и Реал Мадрид.

– Сите знаете дека имаме проблем само со еден играч на Мајорка, сите знаете дека се работи за Мафео. На сите натпревари имаме проблеми со него, играчите од тимот се лути на него, но најважно е да се остане фокусиран.

– Победивме на натпреварот и тоа е најважно, не треба да се обрнува внимание на такви детали. Јас не сакам да зборувам за момче кое сака да биде во центарот на вниманието, – изјави Чуамени.