Човекот кој го наследи Конте во Тотенхем: Верувам дека оваа ситуација нема да го промени нашиот однос

Антонио Конте заработи отказ од Тотенхем и на тој начин се стави крај на соработката која не траеше ниту 18 месеци, но сепак клубот не го распушти комплетниот стручен штаб на Италијанецот.

Иако во нормални услови си одат сите асистенти од доверба на менаџерот кој добива „шут-карта“, во случајот на Тотенхем не беше така, па Даниел Леви соопшти дека наследник на Конте до крајот на сезоната ќе биде Кристијан Стелини.

Станува збор за човекот кој го менуваше Конте на клупата додека Антонио беше на операција, но неговото останување се смета за доста неочекувано со оглед на тоа што се работи за тренер кој беше со Италијанецот и во Интер.

Дел од италијанските медиуми тврдат дека ова ќе значи крај на нивната соработка во иднина, а Стелини се надева дека Конте нема да се лути и дека односот ќе остане непроменет.

– Навистина ми е жал за отказот на Конте, кога има менаџерска смена, сите чувствуваат одговорност. Јас бев дел од неговиот тим и се надевам дека мојот однос со Антонио ќе остане ист. Ништо нема да се промени, ние бевме пријатели, колеги и се познаваме доста долго. Верувам дека оваа ситуација нема да го промени нашиот однос, – вели Стелини.